لاہور میں پولیس اور رینجرز کا آپریشن،جانی نقصان کی اطلاعات

Muhammad Dastagir 18 Apr, 2021 عالمی

لاہور:پولیس اور رینجرز نے لاہور میں یتیم خانہ چوک پرکئی روز سے دھرنا دیئے بیٹھے مظاہرین کو منتشر کرنے کیلئے آپریشن کیا ہے۔ آپریشن کے دوران یتیم خانہ چوک کی جانب جانے والے تمام راستے بند کردیے گئے جبکہ قانون نافذ کرنے والے اداروں اور مظاہرین کے درمیان جھڑپوں کی اطلاعات ہیں۔ تصادم کے دوران جانی نقصان کی اطلاعات بھی ملی ہیں۔دوسری جانب وزیراعلیٰ پنجاب کی معاون خصوصی برائے اطلاعات فردوس عاشق اعوان نے کہا ہے کہ آج صبح پٹرول بموں اور تیزاب کی بوتلوں سے لیس جتھوں نے نواں کوٹ پولیس سٹیشن پر حملہ کیا۔ ان کا کہنا ہے کہ رینجرز اور پولیس اہلکار اندر پھنس گئے، حملے میں 6 پولیس اہلکار زخمی ہوئے جبکہ متشدد جتھے ڈی ایس پی نواں کوٹ سمیت 12 پولیس والوں کو اسلحے کے زور پر اغواء کر کے اپنے مرکز میں لے گئے، جہاں 50 ہزار لٹر کا آئل ٹینکر بھی رکھا گیا۔ فردوس عاشق اعوان نے کہا کہ پولیس نے کوئی آپریشن پلان یا شروع نہیں کیا، جوابی کارروائی صرف اپنے دفاع اور مغوی پولیس اہلکاروں کو بچانے کیلئے کی گئی، اس سے پہلے ان جتھوں کے ہاتھوں 6 پولیس اہلکار شہید اور 700 سے زائد زخمی ہوچکے ہیں۔