ہندوستان میں مسلمانوں کے بارے میں کوئی اچھی خبر سننے کے لئے کان ترس جاتے ہیںاس کے برعکس بری خبر ہر لمحہ سماعت سے ٹکرانے کیلئے تیاررہتی ہے اور یہیں سے انسان کا مزاج بنتا ہے۔ برادران وطن ہی نہیں بہت سارے مسلم صحافیوں، دانشوروں، پروفیسروں، سیاست دانوں اور ماہر عمرانیات ( خصوصاً انگریزی میں پڑھنے لکھنے والے)کی شکایت رہتی ہے کہ مسلمان یا اردو اخبارات منفی خبروں(سچ بات) کو زیادہ جگہ دیتے ہیں۔مطلب یہ ہے کہ اگر آپ کا قتل ہوجائے تو آپ کہیے کوئی بات نہیں معاشرے میں ایسا ہوتا رہتا ہے۔ مسلم نوجوانوں کو دہشت گردی کے الزام میں جیل میں سڑایا جائے تو آپ ظلم و زیادتی کی شکایت کرنے کے بجائے حکومت اور خفیہ ایجنسیوں کا اس بات کے لئے شکریہ ادا کیجئے کہ انہوں نے آپ کو نہیں پکڑا۔ آپ کے وقف املاک پر اگر قبضہ ہوجائے تو یہ کہیے دہلی کی جامع مسجد پر تو قبضہ نہیں کیا۔مسلمانوں کے لئے مخصوص حکومت کی اسکیم کو دوسرے کھاتوں میں ڈال کر ۔خرچ کردیا جائے تو یہ کہیے کہ یہ بھی تو ہندوستانی ہی تھے ۔

مسلمانوں کی تعلیمی اداروں کو تباہ وبرباد کردیا جائے تو آپ یہ کہیے کہ سب کو تو برباد نہیں کیا۔ فسادات میں منظم منصوبہ بندی کے تحت مسلمانوں کی تجارت ، ان کے کاروباراور جان کا بڑے پیمانے پر اتلاف کردیا جائے تو آپ کہیے کہ فسادیوں نے سب کو تو نہیں مارا اور اس کے لئے آپ فسادیوں کا شکریہ ادا کریں۔ غرض کہ آپ شکایت نہیں حکومت، میڈیا، مقننہ، عدلیہ اور انتظامیہ کی شان میں ہمیشہ رطب اللسان رہیں تو آپ سیکولراور سچے ہندوستانی ہیں ۔ اگر آپ نے حق اور سچ بات کہہ دی تو آپ کی حب الوطنی مشتبہ ہوجائے گی اور آپ پر منفی سوچ رکھنے کا ٹھپہ لگ جائے گا۔ یہ باتیں اکثر کہی جاتی ہیں۔ ایک طرف اردو کے اخبارات کو اور دوسری طرف ہندی اور انگریزی کے اخبارات کو دیکھیں تو ہندی اور انگریزی اخبارات میں مسلمانوں کی مجرمانہ سرگرمیوں کی خبر تو ہوگی لیکن ان پر حکومت، خفیہ ایجنسیاں ، سیاسی پارٹیاں اور دیگر کے ڈھائے گئے مظالم کی خبریں نہیں ہوں گی کیوں کہ برادران وطن کی یہ پختہ سوچ ہے کہ (صرف کچھ کو چھوڑ کر)مسلمانوں پر ڈھائے گئے مظالم کے بارے میں باتیں کرنا ملک کی شان اور وقار کے خلاف بات کرنے کے مترادف ہے۔ یہی وجہ ہے کہ بڑے سے بڑے واقعات کو کسی بھی پلیٹ فارم پر جگہ نہیں ملتی جیسا کہ خالد مجاہد کے معاملے کو جگہ نہیں ملی۔ سربجیت کے معاملے میں پورے ہندوستان کو جنگ کے دہانے پر پہنچانے والا میڈیاخالد مجاہد کے حراستی قتل کے بارے میںبالکل خاموش رہا۔ اردو اخبارات میں ہی اہم جگہ پر اسَخبر کو شائع کی گئی ہے ۔ انگریزی، ہندی اخبارات نے اہمیت کے ساتھ شائع نہیں کی۔ چھوٹی سے چھوٹی چیزیں، سانپ بچھو اور دیگر دیومالائی چیزوں کو گھنٹوں نشر کرنے والا ہندی نیوز چینل کو تو سانپ ہی سونگھ گیا۔ کسی نیوز چینل نے اسے پرائم ٹائم میں جگہ نہیں دی اور نہ ہی اس پر مذاکرہ کرایا۔ سرب جیت کے معاملے میں رات دن ٹی وی چینلوں پر چلنے والی خبروں اور مباحثوں کے برعکس خالد مجاہد کے معاملے نے یہِثابت کردیا ہے کہ ہندی نیوز چینلوں کے پاس نہ وقار ہے، نہ انسانیت ہے اور نہ ہی وہ کسی صحافتی اصول کا پابند ہے۔ اگر پابند ہے تو صرف اور صرف’ ہندوتو کی پالیسی‘ کا جس میں مسلمانوں کے لئے کوئی جگہ نہیں ہے۔
خالد مجاہد کے ساتھ وہی ہوا جس کا ڈر تھا۔ یہ اس ذہنیت کا نتیجہ ہے جس کی سوچ یہ ہے کہ پکڑے گئے مسلمانوں کو کھانا کھلاکر اناج کو برباد کرنا ہے جہاں پکڑو وہیں مار دو۔ یہ سوچ جاہلوں کی نہیں بلکہ پڑھے لکھے، قانون داں اور دانشوروں کی ہے اور یہ لوگ ہمیشہ ہی ماورائے عدالت مسلمانوں کے قتل کے حامی رہے ہیں۔ اس طرح کے جملے ٹی وی شو کے مباحثوں اور مذاکروں میں ہندوستان کے وکلاء، دفاعی ماہرین، اینکرس، سیاست داں اور صحافی بارہا دہراتے دکھائی دیتے ہیں۔ یہی سوچ یہاں کی پولیس اور خفیہ ایجنسیوں کی بھی ہے۔ جو ایک بار پکڑا جائے اسے مار ڈالا جائے کیوں کہ جب تک زندہ رہے گا حقیقت عیاں ہوتی رہے گی اور خفیہ ایجنسیوں کے سیاہ کارنامے دنیا کے سامنے آتے رہیں گے اس لئے قتل کرنا ان کے سامنے بہترین متبادل ہوتا ہے۔ ان قاتلوں کو یہ یقین ہوتا ہے کہ قتل کرنے کے بعد ان سے نہ باز پرس ہوگی اور نہ ہی انہیں سزا ملے گی ۔ آزادی کے بعد اب تک سیکڑوں مسلم نوجوانوں کو حراست میں یہ لوگ قتل کرچکے ہیں اور اب تک ان میں سے کسی کا بال باکا تک نہیں ہوا ہے اس لئے خوف کی کوئی بات نہیں ۔قتیل صدیقی، خواجہ یونس اور حال ہی میں جاوید علی کو قتل کیا گیا لیکن سزا دینا تو دور کی ان لوگوں کی شناخت تک نہیں ہوئی البتہ خواجہ یونس کے معاملے میں کچھ پولیس اہلکاروں کی شناخت کی گئی لیکن کسی کو سزا نہیں ملی ۔ خالد مجاہد کو بھی قتل کرنے کے پس پشت یہی ذہنیت کارفرما ہے۔ پاکستان کی کوٹ لکھپت جیل میں سربجیت کے قتل کے بعدپہلے ثناء اللہ اور پھر جاوید علی اور اب خالد مجاہد کو قتل کیا گیا ہے۔ پولیس نے پہلے لو لگنے سے موت ہونے کی تھیوری پیش کی پھر حرکت قلب بند ہونے کی تھیوری پیش کی۔ خالد مجاہد کے وکیل نے فیض آباد کی عدالت میں اسے ٹھیک ٹھاک دیکھا تھااور وہ اپنے لباس کرتا پائجامہ میں ہی تھا لیکن جب اسے اسپتال پہنچایا گیا تو ٹی شرٹ میں تھا۔ یہ کیسے ہوا۔ اس کے جسم اور گلے پر تازہ خم کے نشان تھے ۔ جس سے اندازہ ہوتا ہے کہ اسے اترپردیش پولیس نے اذیت دے کر قتل کیا ہے۔ کیا ایسا بھی ہوسکتاہے کہ لو لگے یا حرکت قلب بند ہونے کی وجہ سے جسم پر زخم کے نشان پیدا ہوجائے؟ اگر ایسا ہے تو یقینا ہندوستانی پولیس کا ایک اہم کارنامہ ہوگا اور یوپی پولیس یقینا بڑے انعام کا حقدار ہوگی۔ خالد کے فیض آباد میں وکیل جمال نے بتایا کہ سنیچر کی دوپہر دو بجے سے چار بجے تک خالد دیگر تین ملزمان کے ساتھ کورٹ میں تھے۔خالد کے لکھنو کے وکیل رندھیر سنگھ سمن نے اسے قتل قرار دیا ہے۔
پولیس کے قتل کرنے کی وجہ بھی موجود ہے کیوں کہ خالد کو نمیشن کمیشین نے بے گناہ قرار دیا ہے اور ان کے خلاف کیس بنانے والے پولیس اہلکار وں کے خلاف سخت کارروائی کی سفارش کی ہے۔ 23 نومبر 2007 کو اتر پردیش کے تین شہروں لکھنو، فیض آباد اور وارانسی میں 25 منٹ کے اندر اندر سلسلہ وار دھماکے ہوئے تھے ان دھماکوں میں 18 افراد ہلاک اور 21 زخمی ہوئے۔اتر پردیش میں ہونے والے ان دھماکوں سے دہلی تک دہل گئی۔ان دھماکوں کے الزام میں طارق قاسمی( 12 دسمبر 2007)کو اعظم گڈھ سے اور خالد مجاہد( 16 دسمبر 2007) کوجونپور سے اترپردیش کی ایس ٹی ایف نے دونوں کا اغوا کیا تھا۔ جس کی گرفتاری بارہ بنکی سے دکھائی گئی تھی۔ 14 دسمبر 2007 کو ڈاکٹر طارق کے اہل خانہ نے مقامی تھانے رانی سرائے میں گمشدگی کی رپورٹ درج کروائی تھی ۔ اس کے خلاف زبردست مظاہرہ کیا گیا ۔ 14 مارچ 2008 کو اتر پردیش کے اس وقت کے ڈی جی پی وکرم سنگھ نے چیف سکریٹری اترپردیش حکومت کو خط لکھ کر عدالتی تحقیقات کی درخواست کی جس کے بعد اسی دن اترپردیش حکومت نے نوٹیفکیشن جاری کر کے ریٹائرڈ جج آر ڈی برمن نمیش کمیشن تشکیل دی۔یہ ایک رکنی کمیشن کو 6 ماہ کے اندر رپورٹ پیش کرنے کے لئے کہا گیا تھا۔ نمیش کمیشن نے تمام واقعات اور حقائق کی جانچ کی اور 31 اگست 2012 کو جانچ رپورٹ اتر پردیش کی حکومت کو پیش بھی کر دی۔ لیکن کمیشن کی رپورٹ کو اسمبلی میں پیش نہیں کیا گیا۔ اکھلیش یادو حکومت نے اپنے انتخابی منشور میںدہشت گردی کے الزام میں گرفتار مسلم نوجوانوں کی رہائی کا مسلمانوں سے وعدہ کیا تھا لیکن ملائم سنگھ یادو اور ان کے بیٹے وزیر اعلی اکھلیش یادو اب تک اس رپورٹ کو اسمبلی میں پیش نہیں کرسکے۔ رپورٹ پیش کئے بغیر مسلسل دباِؤ کی وجہ سے حکومت نے ان دونوں نوجوانوں سے تمام مقدمات واپس لینے کا اعلان کردیا اور عدالت میں درخواست بھی دے دی لیکن حشر وہی ہوا جس کا اندازہ ایک ادنی انسان کو بھی تھا۔ عدالت نے یوپی حکومت کی درخواست مسترد کردی۔ کیوں کہ اترپردیش حکومت کی نیت رہا کرنے کی تھی ہی نہیں اس لئے اس نے قانونی طریقہ اختیار نہیں کیا۔ جب تک نمیش کمیشن کی رپورٹ کو ایکشن ٹیکن رپورٹ کے ساتھ اسمبلی میں پیش نہیں کیا جاتا اس وقت تک اس کی کوئی اہمیت نہیں ہے۔ اس رپورٹ کے مطابق خاطی پولیس افسران کے خلاف کارروائی کی سفارش کی گئی تھی جو اترپردیش حکومت کسی قیمت پر نہیں کرنا چاہ رہی تھی۔ اس لئے خالد مجاہد کو قتل کیاگیا تاکہ پولیس افسران کارروائی سے بچ جائیں۔ پولیس اور اترپردیش ایس ٹی ایف کے پاس کوئی ثبوت موجود نہیں تھا اور تمام پیش کردہ ثبوت فرضی اور من گھڑت ثابت ہوئے تھے ۔ اترپردیش پولیس اور ایس ٹی ایف نے جوش میں آر ڈی ایکس کی برآمد بھی دکھادی تھی ممبئی بم دھماکے کے علاوہ ہندوستان کے کسی دھماکے میں آر ڈی ایکس کا استعمال نہیں ہوا ہے۔ اس دھماکے تک حکومت کی ایجنسی ہی پہنچ سکتی ہے۔
یوپی کے وزیر اعلی اکھلیش یادو نے خالد مجاہد کی موت کی سی بی آئی تحقیقات کا حکم دے دیا ہے لیکن مسلمانوں کو بہت امید نہیں رکھنی چاہئے۔ پوسٹ مارٹم کرکے لاش لواحقین کے حوالے کردی گئی ہے ۔لاش کے معائنے سے بھی اذیت دینے کا معاملہ سامنا آیا ہے۔ اس کے علاوہ لکھنو ضلع جیل کے سپرنٹنڈنٹ ڈی آر موریہ نے کہا کہ خالد مجاہد بیمار نہیں تھا۔ تو پھر اچانک کیا ہوگا کہ آنا فاناً ان کی موت ہوگئی۔ خالد مجاہد کے اہل خانہ نے بھی کہا کہ پولیس خالد مجاہد کو قتل کردینے کی مسلسل دھمکی دے رہی تھی۔ مسلمانوں حراست میں اور ماورائے عدالت قتل کرنے کی طویل منصوبہ بندی کی گئی ہے۔ گزشتہ دنوں اسی نوعیت کاایک واقعہ پونے کی یروڈا جیل میں پیش آیا ہے جہاں قتیل صدیقی نام کے ایک نوجوان کو بے رحمی کے ساتھ موت کے گھاٹ اتار دیا گیا تھا، یروڈا جیل کی انتہائی سیکورٹی والے انڈا سیل میں ہوئی قتیل صدیقی کی موت نے کئی سوالات جنم دیئے ہیں حالانکہ جیل انتظامیہ نے اسے ساتھی قیدیوں کے ذریعے کیاگیا قتل قراردیا ہے۔ لیکن چہار جانب سے قتیل صدیقی کی موت پر سوالات اٹھ رہے ہیں جن کا جواب ابھی ملنا باقی ہے۔ اقوام متحدہ کے ذیلی ادارے نے اپنی ایک تحقیقی رپورٹ میں پایا ہے کہ ہندوستان کی مختلف ریاستوں کے 47 اضلاع پر دو سال تک کئے گئے ایک سروے میں پتہ چلا ہے کہ ہندوستان میں ہر سال1.8 ملین افراد پولیس تشدد کا شکار ہوتے ہیں۔ رپورٹ میں یہ بھی کہا گیا ہے کہ ہندوستان میں قائم قومی انسانی حقوق کمیشن کی ایک رپورٹ کے مطابق روزانہ 43 افراد پولیس زیادتی کے سبب ہلاک ہوجاتے ہیں۔ رپورٹ میں یہ بھی کہا گیا ہے کہ زیر حراست اموات کی سب سے زیادہ شکایات جموں وکشمیر اور ملک کی شمال مشرقی ریاستوں سے موصول ہوئی ہیں جہاں گزشتہ کئی دہائیوں سے بدامنی کا ماحول برپا ہے۔ رپورٹ میں پولیس کی جانب سے دی جانے والی اذیتوں کی وضاحت کچھ اس طرح کی گئی ہے ۔رپورٹ میں کہا گیا ہے کہ زیر حراست افراد کو ذہنی اور جسمانی اذیت کا شکار بنایا جاتا ہے اور بعض اوقات تشدد کی انتہا کی وجہ سے انہیں ہمیشہ کے لئے معذور کردیاجاتا ہے۔ جسم کے نازک مقامات پر بجلی کے شارٹ کا لگایا جانا، جلتے ہوئے اسٹوو کو دونوں پیروں کے درمیان رکھ دینا نیز لوہے کی راڈ سے دونوں پیروں کے درمیان تکلیف دینا پولیس زیادتی کا آزمودہ طریقہ ہے۔ گویا اذیت دینے کے انتہائی خطرناک طریقوں کا استعمال ہماری پولیس کھلے عام کرتی ہے ، لیکن اس طرح کی رپورٹوں کے باوجودپولیس زیادتی کو کنٹرول کرنے کے لئے کوئی موثر اقدام تو درکنار ان واقعات کا کوئی نوٹس تک نہیں لیا جاتا، ان واقعات سے نہ صرف پولیس کی سفاکی اور ظالمانہ کردار کا پتہ چلتا ہے بلکہ ہندوستان میں حقوق انسانی کے تحفظ کی اصل تصویر سامنے آتی ہے۔
خالد مجاہد کی پوسٹ مارٹم کی رپورٹ ابھی نہیں آئی ہے ۔ تفصیلات آنے میں چند دن لگ سکتے ہیں۔جس طرح کے حالات ہیں اس میںسچ بات سامنے آئے اس کی امید بہت کم ہے ۔کیوں کہ داکٹروں پر بہت دباؤ ہوتا ہے اور دباؤ کی وجہ سے ڈاکٹر اذیت رسانی کی موت کو فطری موت یا کسی بیماری ہونے والی موت قرار دے دیتے ہیں۔ یہ بات ایک رپورٹ میں سامنے آئی ہے ۔ ایشئن ہیومن رائٹس کے ڈائریکٹر سہاس چکما کے مطابق’ان تحویل میں ہونے والی ہلاکتوں کی کوئی تفتیش نہیں کرائی جاتی اور اس قسم کی بھی اطلاعات موصول ہوئی ہیں کہ ڈاکٹر پولیس کے زبردست دباؤ میں رہتے ہیں اور اسی دباؤ میں وہ پوسٹ مارٹم رپورٹ میں یہ لکھ دیتے ہیں کہ مرنے والے شخص کے ساتھ ایذا رسانی نہیں ہوئی ہے۔رپوٹ میں یہ بھی کہا گیا ہے کہ ہندوستان ایذا رسانی سے ہونے والی اموات کو قبول کرنے سے انکار کرتا رہا ہے۔آج سے کچھ برس قبل حقوق انسانی کے تحفظ کے لئے سرگرم سماجی کارکنان کے مسلسل دباؤ کے بعد مرکزی حکومت نے انسداد تشدد بل تیار کیا تھا جسے لوک سبھا نے پاس بھی کردیا تھا لیکن جب بل کی کمزوریوں کے خلاف سماجی کارکنان نے آواز اٹھائی اسے مسترد کرکے اس بل کو واپس لے لیاگیااور ازسرنو دوسراس بل کوڈرافٹ کیاگیا لیکن یہ نیا بل حکومت کی بدنیتی کی وجہ سے ابھی تک سرد خانے میں پڑا ہے۔ آئے دن ہونے والی حراستی اموات نے ملک کے سنجیدہ شہریوں کو تشویش میں مبتلا کردیا ہے۔ حکومتیں اگرحقائق کو نظرانداز کرنے کے رویے پر اسی طرح کاربند رہیں تو ملک کے عوام میں مایوسی اور خوف گھر کرجائے گا۔ یہ صورتحال ایک صحت مند مستقبل کے لئے انتہائی نقصان دہ ثابت ہوگی اور موجودہ حالت میں تبدیلی پولیس کی جوابدہی طے کئے بغیر ممکن نہیں ۔اس کے علاوہ ہندی میڈیا کے لئے بھی احتساب کا دن ہے جس طرح سربجیت کے معاملے پر پاکستان کو وحشی ، جلاد اور درندہ گلا پھاڑ پھاڑ کر قرار دے رہے تھے اب وہ اترپردیش پولیس کو کیا کہیں گے؟یکے بعد دیگرے جیل میںاذیت رسانی سے کئی اموات ہوچکی ہیں اور وہ سب مسلمانوں کی ہوئی ہیں تو یہ سمجھاجانا چاہئے کہ ہندوستان کی حکومت مسلمانوں کو ماورائے عدالت قتل کرنے کا منصوبہ بناچکی ہے؟ ایک رپورٹ کے مطابق ہندوستانی جیلوں میں مسلمانوں کی تعداد تقریباً 35 فیصد ہے۔کیا یہ اسی سازش کاحصہ ہے کہ پہلے سازش کرکے اسے جیل بھیج دیا جائے اور پھر جیل میں اسے قتل کردیا جائے اوریہ باور کرایا جائے کہ گروپ بندی میں اس کی جان گئی؟

ہر سال مئی کے مہینے میں ہائپر ٹینشن یعنی بلڈ پریشر کا دن منا یا جاتا ہے۔ اس دن کا مقصد عام لوگوں میں بلڈ پریشر یعنی بلند فشار خون کے منفی اثرات کے بارے میں آگا ہی اور شعور بیدار کرنا ہے۔ حسب معمول اور حسب روایت اسی دفعہ بھی اس دن منانے کے مناسبت سے ملک کے مایہ ناز ما ہر امراض قلب اور میڈیکل سپیشلسٹ اور جنیاتی انجینیرنگ کے ڈائریکٹر جنرل سید علی رضا کا ظمی سے ملاقات ہوئی۔ ڈا کٹر سید علی رضا کا ظمی صا حب نے ہائی بلڈ پریشر کے وجوہات بتاتے ہوئے کہا کہ بلڈ پریشر کی بُہت ساری وجوہات ہیں جس میں نمک کا زیادہ استعمال ، تمباکو نو شی، شوگر کا مرض، کاہلی سستی اور آرام طلبی، جسمانی مشقت کی کمی،پو ٹا شیم، کیلشیم، میگنیشیم اور وٹا من ڈی کی کمی،شراب نو شی اورا لکو حل کا استعمال،ذہنی تناؤ اور ڈیپریشن،عمر کا تقاضا، اسقاط حمل اور مانع حمل ادویات کا استعمال،وراثتی بلڈ پریشر ، گر دوں کی کوئی پیچیدہ بیماری، تھارائیڈ کے مسائل اور جسم میں رسولی کی موجو دگی، وزن کا بڑھ جانا، ورزش کی کمی وغیرہ مسائل شامل ہیں۔ڈا کٹر کا ظمی کا کہنا ہے کہ بلڈ پریشر کی علامات میں شدید سر درد، تھکان ، بے چینی کی کیفیات کا شکار ہونا،چکر آنا، متلی، بصارت اور دیکھنے کے مسائل، سینے میں تکلیف، نیند کی کمی یا نیند میں مسائل ،سانس میں مسائل، دل کی بے ترتیب دھڑکن اور چھوٹے پیشاب میں خون آنا اور عمر کے آخری حصے میں پہچاننے کی صلا حیت میں کمی شامل ہے۔ ڈاکٹر کا ظمی کا کہنا ہے کہ جب ہم رات کو سوتے ہیں تو بلڈ پریشر عموماً نارمل ہوتا ہے اورصُبح اُٹھنے کے چند گھنٹوں بعد بڑھنا شروع ہو جاتا ہے۔ ڈاکٹر کا ظمی کا کہنا ہے کہ ہمیں چاہئے کہ ہم اپنے بلڈ پریشر کو کنٹرول میں رکھیں ۔ کہتے ہیں کہ 120/ 80 منا سب بلڈ پریشر جبکہ 140/ 90کو ہائی بلڈ پریشر کہا جاتا ہے۔یہاں یہ بات قابل ذکر ہے کہ50/30 سب سے کم بلڈ پریشر گر دا نا جاتا ہے۔ نمک کے استعمال کا ذکر کرتے ہوئے کا ظمی کا کہنا ہے کہ ایک بڑے یعنی با لغ انسان کو 6 گرام یعنی چائے کا چھوٹا در میانہ چمچہ نمک دن میں استعمال کرنی چاہئے جبکہ نا با لغ بچوں بچیوں کو دن میں تین گرام نمک کا ستعمال کرنا چاہئے ۔ اگر ہم خواراک میں نمک نہ بھی استعمال کریں تو کوئی قباحت نہیں کیونکہ خوراک میں پہلے سے جو نمک قدرتی طور پر پائی جاتی ہے وہ انسانی جسم کے لئے کافی ہوتی ہے ۔ڈ ا کٹرصا حب کا کہنا ہے کہ بلڈ پریشر اور وزن کو کنٹرول کرنے کے لئے دن میں کم ازکم 45 منٹ تیز واک،چینی کاکم سے کم استعمال،اپنی طر ز زندگی میں مُثبت تبدیلی لانا،ٹینشن ڈیپریشن اور تشویش کو اسلامی اصولوں صبر، شکر ، ذکر و صلوۃ سے کنٹرول کرنے کی سعی کرنا ، ما دی معا ملات میں اپنے سے بڑوں کے بجائے چھوٹوں کو دیکھنا اور اللہ کا شکر کا بجا لانا سب سے اہم اور قابل ذکر باتیں ہیں۔ڈا کٹر کا ظمی فر ماتے ہیں کہ میگنیشیم اور کیلشیم دزن اور بلڈ پریشر کنٹرول کر نے میں اہم کرا دار ادا کر تا ہے۔ڈا کٹر کا ظمی کا کہنا ہے کہ یو رپین جرنل آف نیوٹریشن کے مطابق کہ خوراک میں میگنیشم سپلیمنٹ سے اوپر والا بلڈ پریشر یعنی سسٹالک بلڈ پریشر دو سے تین درجے اور نیچے والا بلڈ پریشر تین درجے گر جاتا ہے۔ہیلتھ کنیڈا کے مطابق اگر ہم دن میں 350 ملی گرام کا میشنیشیم سائٹریٹ لیںتو یہ کا فی ہے۔ ڈا کٹر کا ظمی کا کہنا ہے کہ سٹریس یعنی تناؤ بھی بلڈ پریشر بڑھانے میں منفی کردار ادا کرتا ہے ۔ کہتے ہیں کہ انسانی جسم میں تناؤ کی وجہ سے 5 سے لیکر دس ڈگری تک بلڈ پریشر زیادہ ہوجاتا ہے۔ ڈا کٹر کا ظمی کا کہنا ہے کہ اگر ہم رات کو سونے پہلے ایک گلا س دودھ لیں تو اس سے سیروٹو نین کا لیول بڑھ جاتا ہے اور اسی طر ح نیند آجاتی ہے اور تناؤ اور ڈیپریشن زیادہ حد تک کم ہو جاتا ہے۔ ڈا کٹر کاظمی کا کہنا ہے کہ کوین میری یو نیور سٹی لندن نے اپنے ایک رسالے ہائپر ٹینشن میں لکھا ہے کہ روزانہ چقندر کا ایک کپ جوس بلڈ پریشر کم کر نے میں اہم کر دار ادا کرتا ہے۔ما ہرین کہتے ہیں کہ جو لوگ چقندر،سونف، بند گو بھی،بر غ کاہو،مولی اور گا جر استعمال کرتے ہیں اس سے انکے بلڈ پریشر کم ہو نے میں بُہت مدد ملتی ہے۔ مشہور مصنف امریتا اہلو والیہ )پی ایچ ڈی( کہتی ہیں کہ جو لوگ سبزیوں اور با لخصوص سبز پتوں والی سبزیوں اور چقندر کا استعمال کرتا ہے اُن میں بلڈ پریشر کے بُہت کم چانسس ہو تے ہیں۔ کیلی فو رنیا یو نیور سٹی کے سائنس دان کہتے ہیں جن لوگوں جوانی اور درمیانی عمر میں بلڈ پریشر ہو تا ہے تو انکے دماغ خراب ہونے کا زیادہ اندیشہ ہو تا ہے۔ ڈاکٹر کا ظمی کا کہنا ہے کہ میگنیشیم انسانی جسم کے چلانے میں اہم کر دار ادا کرتا ہے لہذاٗ ہمیں چاہئے کہ ہم ہمیشہ میگنیشیم بھری خوراک کا استعمال کریں۔ میگنیشیم کی کمی کی وجہ سے جو بیماریاں جنم لیتی ہیں اُن میں دل کی بیماریاں، ہائی بلڈ پریشر،شوگر، اعصابی کمزوری،دما غ کے خون کا بلاک ہونا وغیرہ شامل ہے۔ ڈا کٹر کا ظمی کا کہنا ہے کہ کسی کو بھی دن میں 400 ملی گرام سے زیادہ میگنیشیم کا استعمال نہیں کرنا چاہئے کیونکہ زیا دہ استعمال کی صورت میں ہیضے کی شکایت ہو سکتی ہے۔ جن جن قدرتی اجناس میں میگنیشیم پایا جاتا ہے اُ ن میں جو، گندم، چاول، خشک جڑی بو ٹیاں، لوکی، ہندواڑے کی بیج ، ناریل، روغنی اناج ، سورج مکھی کی بیج،بادام صنوبر، چینی کا شیرہ وغیرہ شامل ہے ہمیں چاہئے کہ مندرجہ بالا قدرتی اجناس استعمال کر کے اپنی میگنیشیم کی ضرورت پو ری کر کے اپنے ہائی بلڈ پریشر کو اعتدال پر لائیں۔ڈا کٹر کا ظمی کا کہنا ہے کہ ہمیں اپنی خواراک میں کیلشیم کا بھی استعمال کرنا چاہئے کیونکہ کیلشیم سے وزن گھٹانے میں مدد ملتی ہے ۔ جب ہمارا وزن اعتدال پر ہو گا تو ہمارا بلڈ پریشر قابو ہو گا۔ جن جن چیزوں میں کیلشیم پایا جاتا ہے اور جو ہائی بلڈ پریشر کے لئے اور وزن کم کر نے کے لئے زیادہ ضروری ہے اُن میں پنیر، دہی،دودھ، مچھلی،پالک،بند گوبھی، شلغم وغیرہ، فائبر یعنی ریشے والی غذا، مالٹے کا جوس سویا بین وغیرہ۔ لہذاء اب ضرورت اس امر کی ہے کہ ہمیں اپنی زندگی کے طو ر طریقوں کو تبدیل کرنا چاہئے اور فطری اور قدرتی چیزوں کا ستعمال کرنا چاہئے ۔ علاوہ ازیں ہمیں چاہئے کہ ہم اسلام کے زریں اصول اور عبادات کو اپنائیں تاکہ ہمارا ذہنی تناؤ کم ہو اور اسی طر ح ہم ہائی بلڈ پریشر سے بچے رہیں۔ ہمیں صبر اور شکر کو زندگی کا اوڑھنا بچھو نا بنانا چاہئے کیو نکہ اس سے ہم ٹینشن اور ڈیپریشن سے بچے رہینگے۔اسلام اعتدال اور صبر کا درس دیتا ہے لہذاء ہمیں چاہئے کہ ہم زندگی کے ہر مو ڑ میں اعتدال اور صبر کا دامن ہاتھ سے نہ جانے دیں۔ اُنکا کہنا ہے کہ 15 سال سے لیکر 19 سال تک کے بچے کا بلڈ پریشر120/81 بیس سے لیکر چوبیس سال تک 132/83, پچیس سال سے لیکر انتیس سال تک 133/84,تیس سال سے لیکر چونتیس سال تک134/85،پینتیس سال سے لیکر انتالیس سال تک135/86،چالیس سال سے لیکر چوالیس سال تک137/87،پنجتالیس سال سے لیکر اننچاس سال تک 139/88،پچاس سال سے لیکر چون سال تک 142/89،۵۵ سال سے لیکر ۵۹ سال تک 144/ 90 اور ۶۰ سال سے لیکر اوپر سالوں تک 147/ 91 ہونی چاہئے۔

۲ سب سے پہلے اپنا ووٹنگ سیریل نمبر درج کرے پھر اپنے حلقہ اور علاقے کے نامزد امیدواروں کی فہرست کو دیکھتے ہوئیاپنے پسندیدہ امیدوار پر ٹچ کرے جیسے ہی وہ ٹچ کرے وہ ووٹ سیو ہوکر آٹو لاک ہو جائے اس طرح ایک ووٹ ہوجائے، یہ عمل آخر وقت تک جاری رہے وقت کے اختتام پر اُس کا ڈیٹا پرنٹ کرلیا جائے یہی اس کا نتیجہ ہوگا سرکاری اور غیر سرکاری بھی۔ اس نظام سے کوئی بھی غلط ووٹ کاسٹ نہیں ہوسکے گا اور کسی بھی سیاسی جماعت کو اعتراض کا موقع بھی میسر نہ آسکے گا لیکن اس میںکیا قباحت ہے جو اس پر عمل کرنے کیلئے تمام سیاسی جماعتیں متفق نہیں ہوتی نظر آرہی ہیں اس کیلئے سپریم کورٹ کو اور الیکشن کمیشن کو از خود نوٹس لیتے ہوئے پاکستان کی بھلائی اور عوامی بہتر مفادات کیلئے عمل کرنا پڑیگا۔ ری پولنگ بھی نہیں کرانی پڑیگی اور نہ سیکیورٹی فورسس کی تعداد میں اضافہ کرنا پڑیگا۔ حیرت و تعجب کی بات تو یہ ہے کہ کوئی بھی صحافی و اینکر اس جانب کوئی بات نہیں کرتا آخر کیوں ؟؟؟ کیا ہمارے صحافی حضرات کسی نہ کسی سیاسی پارٹی کا حصہ بنیں بیٹھے ہیں جو حقیقت سے آشنا ہونے کے باوجود شتر مرغ کی طرح اپنی اپنی گردیں ریت میں چھپاکر بیٹھ گئے ہیں یہ صحافتی اقدار کے خلاف ہے اور میڈیا کی اخلاقیات کے منافی بھی۔ میں ایک ادنیٰ سا صحافی ہوں مگر اپنے فرض کو اچھی طرح سے سمجھتے ہوئے برملا یہ کہتا ہوں کہ اس جدید کمپیوٹرائز عمل سے سارے جھگڑے ختم ہوجائیں گے اور پاکستان میں مستحکم و مضبوط جمہوری عمل دیکھنے میں آئے گا۔ اگر اس عمل پر سنجیدگی سے عمل نہ کیا گیا تو یاد رکھئے پاکستان کو معاشی و اقتصادی، معاشرتی، مذہبی، سیاسی، تجارتی، سلامتی گو کہ ہر پہلو سے شدید نا تلافی نقصان سے دوچار ہونا پڑیگا۔ یہ لمحہ فکریہ ہے اسے عملی جامع پہنانے کیلئے ہماری ایجنسیوں، فورسس، وکلاء، دانشور، کالمکار، اینکرز اور صحافی برادری کو بھرپور اپنا کردار ادا کرنے پڑیگا ۔ اللہ ہم سب کا حامی و ناظر رہے ۔ پاکستان زنادہ باد، پاکستان پائیندہ باد۔

کراچی پاکستان کا سب سے بڑا شہر ہے ۔ اسے کسی وقت روشنیوں کے شہر کہا جاتا تھا۔ اسے پاکستانی ماں کی طرح سمجھتے تھے جو ہر حال میں اپنی اولاد کو کھانا پینا مہیا کرتی ہے۔ کراچی شہر میں کوئی بھوکا نہیں سو سکتا تھا اور نہ ہی کوئی بے روزگار ہوتا تھا۔

لوگ ہر شہر سے یہاں مزدوری کیلئے آتے اور اپنا اور اپنے اعیال کا پیٹ بھرنے کاسامان کرتے تھے۔ یہ محبتوںکے شہر سے نفرتوں کی آماجگاہ کیسے بن گیا۔جی ہاں سیاسی مفادات نے اسے محبتوں کی گود سے نفرتوں کے الاؤ میں تبدیل کر دیا۔ کراچی کے رہنے والوں کو یہ باور کرایا گیا تھا کہ اگر یونہی لوگ یہاں آ کر بستے رہے تو پھر یہ ہمارا روزگار کم کر دیں گے۔ یہ شہر پر قبضہ کر کے ہمیں یہاں سے نکال دیں گے ۔ مہاجربھائیوں کو اس بے بنیاد ترغیب پر بھڑکایا گیا او ران کے حقوق کے نام پر کھیل شروع ہوا۔ لازمی امر ہے کہ کراچی پر صرف مہاجروں کا حق نہیں ہر پاکستانی کا حق ہے ۔ اس پر مہاجروں کی اجارہ داری کو تسلیم نہیں کیا جاسکتا ۔ کراچی میں پہلے پہل ہزارہ ڈویژن اور میانوالی ڈویژن کے لوگ کثرت سے گئے تھے۔ یہ ہوٹلوں پر کام کرتے اور ٹرکوں اور بسوں کے کاروبار سے وابستہ تھے ۔ مزدوری پیشہ بھی کافی لوگ تھے۔ ان کے ساتھ جھگڑے کیے گئے انہیں مارا پیٹا گیا ۔ ان کی املاک کو نقصان پہنچایا گیا۔ یہ لوگ صبر کرتے رہے لیکن مہاجر چاہتے تھے کہ یہ لوگ یہاں سے ہر حال میں اپنا سب کچھ چھوڑ کر چلے جائیں۔ اس کیلئے ایسے قوانین بھی ڈسڑکٹ لیول پر بنائے گئے جس سے غیر سندھی کو غیر ملکی سے تشبیہ دی گئی۔ مہاجر قومیت کو مظلومیت کا نشان بنانے اور ان کے نام پر سیاست کرنے کا آغاز ایم کیو ایم کا جنم دن ہے۔ ایم کیو ایم کراچی میں مہاجروں کی اجارہ داری کیلئے کام کرنے اور ان کی فلاح وبہبود اور تحفظ کو منشور قرار دے کر مہاجروں کی ہمدردی سمیٹنے میں کامیاب ہوئی۔ جماعت اسلامی بھی مہاجروں کے حقوق کیلئے کام کرتی تھی اسے بھی ایم کیو ایم کی مخالفت کا سامنا کرنا پڑا ۔ پہلے پہل ایم کیو ایم جماعت اسلامی کو اپنا حریف قرار دے کر ان کے خلاف محاذ آرائی کرتی رہی۔ وقت کے ساتھ اس میں مزید اضافے ہوتے گئے۔ پختون ہزارہ اتحاد ، پنجابی ہزارہ اتحاد جماعت اسلامی نے بہت کوشش کی لیکن ایم کیو ایم کا عفریت ان کے قابو سے باہر ہوتا گیا۔ ضیاء الحق کے مارشل لا کے دور میں ایم کیو ایم کو فری ہینڈ دیا گیا جس سے پیپلز پارٹی مسلم لیگ جیسی قومی جماعتیں بھی اس کے سامنے جھکنے پر مجبور ہوگئیں۔ایم کیو ایم کراچی میں اجارہ داری کیلئے کوشاں تھی کہ اسے جناح پور کا خواب بھی نظر آیا۔ اس پر آرمی نے اس کی برین واشنگ کر کے اسے اپنی اوقات میں لایا تھا۔ ایم کیو ایم نے سیاسی مخالفین اور جماعت کے سامنے آنے والی ہر رکاوٹ کو روندڈالنے کی روایت جاری رکھتے ہوئے اپنے ہی آفاق احمد کو بھی روندنے کی کوشش کی ۔ وہ جان بچانے کیلئے جیل کی سلاخوں کے پیچھے پناہ گزیں ہوا۔ الطاف حسین نے ہر بولنے والی آواز کو چپ کرانے کی ٹھان لی اور اپنے ہی قریبی ساتھیوں کو شک کی بنیاد پر بھی ٹھوک دینے کے آرڈر جاری کیے۔ سیاست خدمت یا فلاح کا عنصر اس جماعت نے بھلا کر سیاسی مخالفین کو تہ تیغ کرنے کو ہی مہاجروں کا حق قرار دے کر باقی منشور پر فوقیت دے دی۔ اب اس جماعت کا یہی منشور ہے کہ سیاسی مخالفین کو بزور طاقت خاموش کر دیا جائے ۔ نہ رہے بانس نہ باجے بانسری کے مصدق نہ مخالف ہو گا نہ ہی بولے گا۔ ایم کیو ایم اب الطاف حسین مافیا بن چکی ہے۔ اسے مہاجروں کی جماعت کہنے کی بجائے الطاف حسین کے کارندوں کا گروہ قرار دیا جانا چاہیے۔ اس جماعت نے جس قدر قتل وغارت اور دہشت گردی کی ہے اس پر اسے سیاسی سماجی فلاحی جماعت کی بجائے دہشت گرد تنظیم قرار دے کر بین کرنا چاہیے۔
الطاف حسین کو بھی ملک کے خلاف بیانات دینے اور توڑنے کی بات کرنے پر غداری کا مقدمہ قائم کر کے حکومت برطانیہ سے اس کی حوالگی کا مطالبہ کرنا چاہیے۔ الطاف حسین نے اس سے پہلے بھی بھارت میں کھڑے ہو کر پاکستان کے خلاف بیان دیا تھا۔ اس کی وڈیو موجود ہے ۔ موجودہ بیان بھی فیس بک سمیت کئی سماجی ویب سائیٹس پر ثبوت کے طور موجود ہے۔ اس سے پہلے بھی انہی صفحات کے توسط سے حکومت کو وارننگ دی تھی کہ ایم کیو ایم کو الطاف حسین کی یرغمالی سے آزاد کرایا جائے۔ الطاف حسین کے خلاف کئی طرح کے مقدمات زیر سماعت تھے جو این آر آو کے تحت معاف کیے گئے۔ اس کے علاوہ جب الطاف حسین نے برطانیہ کی شہریت اختیار کر لی ہے تو پھر وہ پاکستان کی کسی سیاسی تنظیم کا چیئرمین کیونکر ہے۔ ایک غیر ملکی شہری کو یہ کیسے استحقاق حاصل ہوا کہ وہ پاکستان کے سیاسی معاملات میں مداخلت کرے اور کسی سیاسی تنظیم کی راہنمائی کا فریضہ کرے ۔ڈاکٹر طاہر القادری کے کیس میں یہ فیصلہ ہو ا کہ ڈیول نیشنل کو یہ حق حاصل نہیں ۔ الطاف حسین کی ملک سے وفاداری بھی مشکو ک ہے پھر بھی اسے تنظیم چلانے کی اجازت دینا پاکستان کے دشمن کو موقع دینے کے مترادف ہوگا کہ وہ جب اور جیسے چاہیے پاکستان کی سا لمیت اور یکجہتی پر وار کرے ۔ الطاف حسین کے موجود ہ طرز بیان پر حکومتی اور سیاسی جماعتوں کے اکابرین کے طرز عمل کو دیکھتے ہوئے یہ کہا جا سکتا ہے کہ انہیں پاکستان سے کوئی سروکار نہیں ۔ انہیں اپنی دستار بلند چاہیے خواہ اس کیلئے انہیں انڈین ٹینکوں پر ہی کیوں نہ بیٹھنا پڑے ۔ نیا پاکستان بنانے والے پرانے پاکستان کو کیا کباڑیے کے پاس بیچنا چاہتے ہیں۔ الطاف حسین جیسے کئی کمیشن ایجنٹ یہ سودا کرانے کیلئے بیتاب بیٹھے ہیں۔ کوشش کی جائے کہ پرانے پاکستان پر ہی گذارا ہو جائے ۔ پرانے پاکستان نے کسی کا کچھ نہیں بگاڑا ۔ اگر کسی نے بگاڑا ہے تو وہ یہ ایجنٹ ہیں جنہیں اپنے کمیشن کیلئے ماں قرار دی جانے والی دھرتی کا سودا کرنے پڑے تو وہ اس سے بھی نہیں چوکتے ۔ذاتی مفادات کو یہ عوامی ایشو بنا کر پیش کر کے اسے عوامی ہمدردی حاصل کرنے کیلئے استعمال کرکے خود کو عوامی سیاسی نمائیندہ قرار دیتے ہیں۔ یہی وجہ ہے کہ سیاست میں الطاف حسین جیسے افراد کیلئے جگہ بن جاتی ہے۔ جس برطانیہ نے انہیں سیاسی پناہ دی ہے کیا وہ سکاٹ لینڈ کے کسی لیڈر کو یہ اجازت دے سکتے ہیں کہ وہ برطانیہ کے خلاف ایسی ہی ہزرہ سرائی کر سکے ۔برطانیہ یورپ اور امریکہ نے تو یہ ٹھیکہ اٹھایا ہوا ہے کہ ہر ایسے فرد کو پناہ دی جائے جو مسلم قومیت میں نفاق کا بیج بونے میں کوئی کردار ادا کرنے کی اہلیت رکھتا ہو۔ کراچی کے مہاجر بھی اب تو ایم کیوایم اور الطاف حسین کے اس روپ اطوارسے تنگ ہیں ۔ وہ بھی اب گلو خلاصی چاہتے ہیں لیکن اب کمبل انہیں چھوڑنے کو تیار نہیں ۔ اگر ایم کیوایم والے بھتہ اور قبضہ مافیہ اور گولی سرکار سے ہاتھ کھینچ لیں تو پھر وہ کھائیں گے کہاں سے اور پیر صاحب کا نذرانہ لندن کیسے ارسال ہو پائے گا ۔ کراچی اب مافیاؤں کے نرغے میں آچکا ہے ۔ اسے ایم کیو ایم کے علاوہ بھی سیاسی بھیس میں کئی اور شکاری شکار کرنے کا موقع دیکھ رہے ہیں۔ یہ ان شکاریوں کی آپس کی جنگ ہے۔ مافیاؤں کی اس جنگ میں عام عوام بھی گیہوں کے ساتھ گہن کی طرح پس رہے ہیں۔ اس کا حل صرف طاقت ہے ۔ طاقت کے غیر جانبدارانہ استعمال کے بغیر کراچی کی روشنیوں کی واپسی کا خواب کبھی تعبیر نہیں پائے گا۔ میاں صاحب اور عمران خان کو چاہیے کہ وہ نفاق کی بجائے اتحاد اور اپوزیشن کی بجائے کولیشن کو ترجیح دیں۔ اس طرح وہ ملا اور ملاکھڑے دونوں کی بلیک میلنگ سے بچ کر شاید عوام کیلئے کچھ کر نے کی پوزیشن میں آ جائیں۔ ایک ایک اور دو گیارہ ہوتے ہیں۔ شاید آ جائے تیری سمجھ میں میری بات ۔

کراچی پاکستان کا سب سے بڑا شہر، اس کا دل اوردر حقیقت پورا پاکستان ہے جس نے اپنی گود میں پنجابی ، پٹھان ،سندھی ، بلوچی اور کشمیری ہر ایک کو سمایا ہواہے اور اسی نے اُن قابل فخر لوگو ں کو بھی اپنی مادرانہ چادر کی چھاوئں میں پناہ دی جنہوں نے قیام پاکستان کے وقت اپنے گھر بارچھوڑے اور ہجرت کی تو کراچی اور کراچی والو ں نے ان آنے والو ںکو بڑی فراخدلی سے اپنی زمین اور گھر بار پیش کر دیے ۔ان مہاجرین نے کراچی اور کراچی نے ان مہاجرین کو عزت اور پیار دیا کسی نے کسی پر احسان نہں جتایا۔سالہا سال تک یہ شہر پیار اور محبت کا گڑھ بنا رہا لیکن بڑے دکھ اورافسوس کی با ت ہے کہ آج ہر ایک کراچی کا احسان ماننے کی بجائے اس پر احسان جتارہاہے بلکہ پاکستان پر احسان جتارہاہے کہ ہم نے اس ملک کی خاطر ہجرت کی۔ اول تو بات یہ ہے کہ وہ جنہو ں نے ہجرت کی تھی اُن میں چند ہی لوگ زندہ ہوں گے اوراب ابھی وہ پاکستان سے بے لوث محبت کرتے ہیں حکومت کے لیے نہیں ۔وہ نسل جو احسان جتا رہی ہے انہیں تو فخر سے کہنا چاہئے تھا کہ ہم ’’سن آف دی سوائل ‘‘ہیں لیکن تیسری نسل نے کہنا شروع کیا کہ ہم نے ہجرت کی ۔ کاش آپ عظمت کے اُس درجے پر ہوتے کہ آپ نظریے کی خاطر اپنی دولت چھوڑسکتے آپ تو حکومت کی خا طر اصو لوں پر یو ں سودے بازی کرتے ہیں جیسے آلو پیاز کی خرید وفروخت کر رہے ہوں ۔
الیکشن 2013میں کراچی میں ہونے والی دھاندلی پر شہریوں کے احتجاج سے گھبراکر متحدہ قومی مومنٹ کے برطانوی قائد الطاف حسین نے دھمکی دیتے ہوئے کہا کہ اگر کراچی کا مینڈیٹ تسلیم نہیں کیا جارہاتو کراچی کو پاکستان سے الگ کیا جائے یعنی حیرت ہے ایک غیر ملکی شخص کی خواہش پر پورا کراچی قربان کر دیا جائے یہا ںبر طانوی شہریت رکھنے والے الطاف حسین کو یہ بھی سمجھ لینا چاہئے کہ کراچی جتنا اردو بولنے والو ں کا ہے اُتنا ہر پاکستانی کا ہے بلکہ پاکستان کا ہر خطہ ہر صوبہ سب کا برابر کا ہے ۔ کیاپشاور ،پنڈی ، لاہور ، کوئٹہ حتی کہ دور دراز کے شہروں میں بھی اردو بولے والے نہیں ر ہتے اور کیا کوئی انہیں وہاں سے نکالنے کی بات کر تا ہے، ہر گز نہیں نہ ہی وہ مقامی آبادی کے نشانے پر رہتے ہیں لیکن کراچی میں جو حالات ہیں وہ الطاف حسین اور ان کے سا تھیوں نے پیدا کر رکھے ہیں خود ہی حالات بگاڑے جاتے ہیں اور پھر ان حا لات کا فائدہ اٹھایا جاتا ہے اور پاکستان کو توڑنے کی دھمکیا ں دی جاتی ہیں یہ لوگ خود کو ۔۔سب کچھ کرنے اور کہنے کے لیے آزاد سمجھتے ہیں نہ پاکستان ان کی دست برد سے محفوظ رہتا ہے نہ قومی نظریہ اور رہنما پچھلے دنوں اُس نے قائد اعظم کی ذات پر جس طرح حملے کیے وہ ایک مخصوص ذہنیت کی عکاسی ہے وہ ذہنیت جنہیںہدایات کہیں اور سے ملتی ہیں اور کارندے وہ ہوتے ہیں اور عام لوگ ان کے یر غمال، ورنہ میں جتنے اردو بولنے والو ں سے بات کرتی ہوں چاہے وہ کراچی کے ہو ں ،پشاور کے یا پنجاب کے میں نے کسی کو ان خیالات کا حامی نہیں پایا بلکہ شدید مخالفت کرتے ہی سنا ۔پھرآخر وہ کون سے حربے ہیں جو مجبور لوگوں پر آزمائے جاتے ہیں اور لندن سے بیٹھ کر ان کی ڈورکھینچ لی جاتی ہے۔ الطاف حسین کے موجودہ بیان پرملک بھرمیں شدیدردعمل آیا اور لندن پولیس کو الطاف حسین کے خلاف ایک رپورٹ کے مطابق پانچ لاکھ سے زیادہ کالیں موصول ہوئیںکہ اس طرح کے بیانات کے تناظرمیں اُس کے خلاف مقدمہ درج کیا جائے لیکن اگر حکومت پاکستان دلچسپی نہ لے تو کسی اورحکومت کو کیا فرق پڑتا ہے۔بحر حال الطاف حسین برطانوی شہری ہے اس سے پوچھاجائے کہ وہ ہمارے ملک کے خلاف ہرزہ سرائی کیسے اور کیوں کرتاہے اور کیوںاس کی حکومت اس سے نہیں پوچھتی کیا حکومت برطانیہ کسی پاکستانی کواجازت دے گی یا برداشت کرے گی کہ وہ اس کے خلاف پاکستان سے سازش کرے۔
حیرت ہمارے میڈیاپر بھی ہے کہ جانتے بوجھتے ہوئے بھی کہ الطاف حسین کے خطاب، خطاب کم اور سازشیںزیادہ ہوتی ہیں پورا خطاب بڑے ذوق و شوق اور پابندی سے ٹیلی کاسٹ کیاجاتا ہے کیا ان ٹیلیفونک خطابات کو بند نہیںکیا جاسکتاکہ فساد کم پھیلے اورآخراس بات پرکوئی کاروائی کیوں نہیںکی جاتی کہ بار بارایسے بیانات کیوںد یے جا رہے ہیںکہ کراچی کواردو بولنے اور نہ بولنے والوںمیں کیوں تقسیم کیا جاتا ہے اردو تو پورے پاکستان کی زبان ہے۔ تقسیم ہندسے پہلے بھی پورے ہندوستان میں بولی جاتی تھی ورنہ علامہ اقبال،مولا نا ظفر علی خان اورسردارعبدالرب نشتراردونہ لکھتے۔لیکن مصطفی کمال علی لاعلان اورببانگ دہل ٹی وی پر بیٹھ کر کراچی کو اسی بنیاد پر تقسیم کر رہا تھاجب کہ کراچی میں توشاہی سید بھی اردو بولتاہے اور نازبلوچ بھی چاہے ان کی مادری زبان کوئی بھی ہے۔ایم کیوایم اگر قومی جماعت بنناچاہتی ہے اور قومی سیاسی دھارے میں شامل ہوناچاہتی ہے تو اسے اپنی ان پالیسیوںمیںتبدیلی کرنا ہو گی اور اپنی قیادت بھی تبدیل کرنا ہوگی ورنہ جب ایک پنجابی ، پٹھان ، سندھی ، بلوچی یا کشمیری دیکھے گا کہ نہ اُس کا ذکرہے نہ فکر تو کیا وہ اُس جماعت کو ووٹ د ے گا۔سیا ست مخصوص گروہوں کے حقوق کے تحفظات کے لیے نہیں بلکہ قومی معاملات کے لیے جاتی ہے مخصوص علاقوں، آبادیوں اور گروہوں کے ل لیے فلاحی تنظیمیں اور این جی اوز کام کرتی ہیں تو کیا ایم کیو ایم ہمیشہ ایک علاقائی تنظیم اورلسانی گروہ رہے گی یا آگے بڑھے گی اوراُس کی قیادت اُسے دہشت گرد ی کے لیبل سے آزاد بھی کرے گی یا نہیں ۔ اس بار تو الطاف حسین نے سر عام اُس میڈیا کو بھی للکارا جس نے ہمیشہ اُسے سنجیدہ قومی سیاست دانو ں سے زیادہ اہمیت دی اُس نے میڈیا کو یاد دلایا کہ’’ کتوں کے بھونکنے‘‘ سے کارواں رُکتے نہیںہیں ۔ بنگلہ دیش بننے کی یاد دہانی بھی وہ کراتے ر ہتے ہیں بلکہ اب کی بار تو انہو ں نے جرنیلو ں کو بھی اپنا مرہون منت کہاتو اُن سے ایک سوال ہے کہ کیامشرقی اور مغربی پنجاب کے درمیان ہجرت میں لاکھوں خاندان تہہ و تیغ نہ ہوئے کیا وہ بھی لاہور کو امر تسر بنانے کی دھمکی دینے لگ جائیں تو پھر آخر ہمارے بزرگو ں نے یہ ملک کیوں ہی بنایا تھا کیا وہ بے وقوف تھے یا ظالم تھے جنہوں نے خون بہایا۔
یہاں میرے کچھ سوالات حکومت ، میڈیا اور عدلیہ سے ہیں کہ ہر حکومت پارلیمنٹ میں اپنی اکثریت قائم کرنے اور رکھنے کے لیے ان ساری باتوں کو کیوں بھلادیتی ہے ، میڈیا کے کچھ اینکرز ان کے گن گاتے کیوں نہیں تھکتے ، کیوں ہر خطاب اور ہر زہ سرائی کو من وعن پیش کرتے ہیں اُس کے بارے میں سو چتے کیوں نہیں اور عدلیہ جو سوموٹو لینے کے لیے کسی واقعے کی تاک میں رہتی ہے کہ کہیں کو ئی واقعہ ہو اور عدالت میدان میں آجائے یہا ں کیو ں چپ رہ جاتی ہے۔ کیا ان سب کے پاس اس کی کچھ وجوہات بیان کرنے کے لیے ہو نگی تا کہ قوم بھی اُن سے آگاہ ہو اور سب سے بڑھ کر کراچی کے لوگ بھی بتائیں کہ آخر وہ کون سے عوامل ہیں جنہوں نے یو ں اُن کی زبانوں پر تالے لگائے ہوئے ہیں کہ وہ کچھ بولتے نہیں کیا اس زمین اور قوم کا ان سب پر کوئی حق نہیں ۔

چینج عام فہم اور روایتی زبان میں ٹوٹے ہوئے پیسے کیلئے استعمال کیا جاتا ہے۔اس کا مطلب یہ ہے کہ 100روپے کا چینج دو پچاس پچاس کے نوٹ بھی ہو سکتے ہیں اور دس دس یا پانچ پانچ کے سکے بھی آپ کو سو کے چینج میں دستیباب ہو سکتے ہیں۔ تبدیلی سوچ کی ہو سکتی ہے عمل میں آ سکتی ہے اور کپڑے بھی تبدیل کیے جاتے ہیں۔ پاکستانیوں نے سمجھ نہیں آیا کیا تبدیل کیا ہے۔ میں تو یہ سمجھ نہیں پایا کہ خان صاحب تبدیلی کی بات کرتے ہیں لیکن خود ہی اس شوریدہ ماحول کے آسیر ہوتے جا رہے ہیں ۔ حیرت کی یہ بات ہے کہ خان صاحب کی عوام کا دیا ہوا مینڈیٹ تسلیم نہ کرنے کی وجہ کیا ہے۔ خان صاحب کس بنیاد پر یہ کہتے ہیں کہ انہیں جن نشستوں پر کامیابی نہیں ہوئی وہاں دھاندلی ہوئی اور جن نشستوں پر انہیں کامیابی ہوئی وہ شفاف ہیں۔ میں سمجھتا ہوں کہ تبدیلی کی بات کرنے والے کو چاہیے تھاکہ وہ سب سے پہلے میں نہ مانوں والے اس سیاسی رویے میں تبدیلی لاتے ۔ انہیں ماحول کو آلود ہ کرنے کی بجائے اس کی شدت میں کمی لانے والے عوامل کو اختیار کر نا چاہیے تھا۔سیاسی پنڈتوں کے دعوی کی تقلید میں اگر یہ سوچ اختیار کی گئی ہے تو سیاسی تجزیہ نگاروں نے تو ایسا کچھ بھی نہیں کہا کہ جس سے سونامی کے آکر سب کچھ بہا لے جانے کی نوید سنائی گئی ہو۔ سیاسی تجزیہ نگاروں اور پنڈتوں کے تجزیے جو ہنگ پارلیمنٹ کے وجود کے آثار دیکھ رہے تھے وہ تو میاں نواز شریف کی اکثریت میں بدل گئے۔ زرداری کے بنائے گئے الیکشن کمیشن کی موجودگی میں کیا یہ ممکن ہے کہ میاں نواز شریف کو حمایت حاصل ہو سکے اور پیپلز پارٹی کلین سویپ ہو جائے ۔ مولانا فضل الرحمان کو جو نشستیں حاصل ہوئی ہیں کیا وہ اس کے بھی مستحق تھے ۔ ایم کیوایم نے تو دھاندلی سے سیٹوں پر قبضہ کیا۔ تمام بڑے نام اتنے بے بس کیسے ہو گئے کہ وہ الیکشن کمیشن نے پری پول کے زریعے ہرا دئیے۔ مسلم لیگ کو پنڈی ڈویژن میں شکست ہونا الیکشن کے فری اینڈ فیئر ہونے کی دلیل ہے۔ حنیف عباسی اور چوہدری نثار علی خان کی شکست اس بات کی دلیل ہے کہ الیکشن فیئر اینڈ فری ہوئے ہیں۔ پی ٹی آئی کی ناکامی کا سب سے بڑا سبب اس کی الیکشن میں پہلی دفعہ شرکت کہی جا سکتی ہے۔ الیکشن میں ووٹر کو باہر لانا پڑتا ہے۔ پی ٹی آئی کے ووٹر باہر آئے اور انہوں نے پول بھی کیا لیکن سیاست کی یہ ناتجربہ کاری پی ٹی آئی کے لیے کئی حلقوں میں شکست کا سبب بنی ہوگی۔ ایسے کئی اور امور بھی پولنگ والے دن ہوتے ہیں جن کے سبب الیکشن والے دن اکثریت بھی اقلیت میں بدل جاتی ہے۔ فتح شکست میں اور تبدیلی نہیں آپاتی۔بہرحال میرے ذاتی خیال میں پی ٹی آئی کو اب چارج لینا چاہیے اور اس طرح اپنا قیمتی وقت برباد کرنے کی بجائے تبدیلی کے عنصر پر توجہ دینی چاہیے۔ اگر وہی سیاسی رویے پی ٹی آئی نے اپنانے ہیں تو پھر تبدیلی کا نعرہ پس پشت جانے کا امکان ہے۔ پی ٹی آئی کی توجہ غیر ضروری احتجاج اور نعروں اور پریس کانفرنسوں میں الجھ جانے کے سبب وہ اپنے مشن سے دور ہو جائے گی۔ جو آنے والے دنوں میں اس کے پاؤں کا پھندہ بن سکتا ہے۔ پی ٹی آئی کی قیادت کو چاہیے کہ وہ ٹائم کی اہمیت کو محسوس کرے اور سیاست ٹائم کو ضائع نہ کرے ۔ سیاسی ٹائم کی قضا نہیں ہوتی۔ وقت ضائع کرنے کی بجائے عملیت پسندی کا ثبوت دیا جائے ۔ عوام نے پی ٹی آئی کو روایتی سیاسی حربوں کی پریکٹس کیلئے منتخب نہیں کیا بلکہ وہ تبدیلی چاہتے ہیں۔ انہی سیاسی رویوں میں تبدیلی سے ہی معاشرے میں تبدیلی کا آغاز کیا جائے۔ روایتی سیاسی ماحول کی بجائے اب سیاسی ماحول میں بھی تبدیلی کو متعارف کرانے کا سہرا یا کریڈٹ پی ٹی آئی لے سکتی ہے۔ یہ بھی ایک سیاسی اچیومنٹ ہوگی ۔ کھینچا تانی کی سیاست سے عوام کو کچھ حاصل نہیں ہوا اور نہ کچھ حاصل ہوگا۔ کچھ ایسا کیا جائے جس سے عوام کی فلاح اور ملک کی ترقی کا رستہ اور منزل قریب ہو۔ عوام کو اب سیاسی نعروں اور احتجاج سے نکال کر ترقی کی راہ پر لانے اور ان کی راہنمائی کی کوشش کی جائے۔ دھاندلی کا جواب پی ٹی آئی اپنے کردار اور اپنے کام سے دے سکتی ہے۔ اس کے راہنما قومی ایشوز پر عوام کی نمائیندگی کا حق ادا کر کے عوام کے دلوں میں راہ پیدا کر سکتے ہیں۔ اپوزیشن کا ویسے تو حق اور کردار اب ان جماعتوں کا ادا کرنا چاہیے جنہوں نے پانچ سال اقتدار کے مزے لوٹے ہیں۔ پیپلز پارٹی اور اس کی اتحادی جماعتوں کو اپوزیشن میں بیٹھنا چاہیے۔ پی ٹی آئی کو نواز شریف کے ساتھ مل کر حکومت بنانی چاہیے اور دونوں کو مل کرعوام کو اس عذاب سے نجات دلانے کی کوشش کرنی چاہیے۔ عوام نے پی ٹی آئی کو اپوزیشن میں بڑکیں مارنے کیلئے منتخب نہیں کیا۔ پی ٹی آئی کی لیڈرشپ کو دیکھنا چاہیے کہ اگر پی پی پی اور اس کے اتحادیوں کو ہی اگر اقتدار میں کولیشن دی جانی ہے تو پھر کیا فائدہ ۔ عوام کو تو کچھ حاصل نہیں ہو ا پی ٹی آئی کی حمایت اور پشت پناہی کر کے ۔عوام کے دئیے ہوئے مینڈیٹ کو صرف نعروں اور احتجاج کیلئے استعمال کرنے کی روایتی سیاست کی بجائے عملی طور پر کچھ کرنے اور تبدیلی کیلئے پی ٹی آئی کو حکومت میں حصہ ڈالنا چاہیے۔ عوام تبدیلی کے خواہاں تھے تو انہوں نے پی ٹی آئی کے امیدواروں کو ووٹ دیا۔ اب یہ پی ٹی آئی کی قیادت کا کام ہے کہ عوام کی توقعات کے مطابق تبدیلی لانے کیلئے اقدامات کریں۔ اگر یہی طرز عمل اور طرز فکر رہا تو پھر یہی تبدیلی آئی گی کہ اگلے الیکشن میں پی ٹی آئی باہر ہوگی اور پیپلز پارٹی اندر ہوگی۔ سیاست عبادت ہے ہر عبادت کی قضا ہوتی ہے لیکن میں سمجھتا ہوں کہ سیاسی عبادت کی قضا بہت مشکل ہوگی۔ اس لیے بہتر ہے کہ اسے ٹائم کے اندر ہی اس کی ادائیگی کر دی جائے ۔
الیکشن کی بہار آئی اور اس سے کسی کو پولن الرجی ہوئی تو کسی کی آنکھوں کو ٹھنڈک میسر آئی ۔ سیاسی تبدیلی کے خواہاں پاکستانیوں نے لیڈر شپ
میں تو کوئی تبدیلی نہیں کی لیکن نمائیندگان میں کافی کانٹ چھانٹ کی۔ الیکشن کمیشن نے اپنے تئیں تو آزاد اور شفاف الیکشن کرانے کی پوری کوشش کی لیکن جسٹس فخر الدین کی بد نصیبی کہ وہ خود کو الزامات کے چھینٹوں سے نہیں بچا پائے۔ اب اس میں ان کا ذاتی طور پر کوئی قصور ہے یا نادانستہ طور وہ اس کاشکار ہو گئے ہیں۔ پاکستان میں یہ تو ٹرینڈ چلتا ہی آ رہا ہے کہ ہار کو ہار تسلیم نہیں کیا جاتا ۔ ایم کیو ایم ، پیپلز پارٹی اور فضل الرحمان صاحب بھی اگر اپنی ہار کو ہار نہیں مانتے تو پی ٹی آئی کیسے تسلیم کر لے۔ عوام ابھی تومنتظر ہیں کہ کون فاتح ہے کون مفتوح ؟ کیا تبدیلی آنے کی توقع پوری ہوگی یا وہی ڈھاک کے تین پات ۔ الزام تراشی سیاسی پوائنٹ سکورنگ ہی سے عوام کے پیٹ بھرے جائیں گے۔ میاں صاحب البتہ کچھ تبدیل نظر آتے ہیں وہ کچھ کرنے کے موڈ میں ہیں۔ امید ہے کہ وہ موجود ہ سیاسی جھٹکے کے بعد بہتر اقدامات سے اپنی سیاسی پوزیشن کو بہتر بنانے کی کوشش کریں گے۔ ویسے بھی یہ ان کی آخری باری ہے اس کے بعد شاید ہو وزیر اعظم کی سیٹ پر نہ آسکیں۔ صدارت کے امیدوار ہو سکتے ہیں ۔ پھر بھی انہیں پاکستان مسلم لیگ کی بقاء کیلئے تو کچھ نہ کچھ کرنا ہی ہوگا۔ تاریخ میں اپنا نام لکھوانے کا یہ موقع سنہری بھی ہے اور آخری بھی ہے۔ میاں صاحب ایک تجربہ کار سیاستدان ہیں وہ اس کو ضرور اس سے فائدہ اٹھائیں گے ۔ البتہ سیاسی ناتجربہ کاری میں کہیں پی ٹی آئی اپنی منزل نہ کھو دے۔ مجھے پی ٹی آئی کی نہیں پاکستانی عوام کے خوابوں کا بھرم ٹوٹ جانے کا دکھ ہوگا۔