لندن ‘( اردو ویب نیوز ڈاٹ کوم ) لاہور سے مانچسٹر جانے والی پی آئی اے کی پرواز پی کے 709 اپنی معمول کی پرواز پر لاہور سے مانچسٹر کی طرف رواں دواں تھی کہ اچانک برطانوی جنگی طیاروں نے پی آئی اے کے طیارے کو فضا میں ہی گھیرے میں لے کر اسٹینسٹڈ ایئرپورٹ پر اتار لیا۔اطلاعات کے مطابق پی آئی اے کے عملے کے ایک رکن کا کہنا ہے کہ دوران پرواز 2 مسافروں نے طیارے کو بم سے اڑانے کی دھمکی دی تھی جس پر پائلٹ نے کنٹرول ٹاور کو اطلاع کر دی ۔ جس کے کچھ ہی دیر بعد برطانوی جنگی طیاروں نے پی آئی اے کے طیارے کو فضا میں ہی گھیرے میں لے کر اسٹینسٹڈ ایئرپورٹ پر اتار کر فوری طور پر خالی کروا کر دونوں مسافروں کو حراست میں لے لیا ۔ایک نجی ٹی وی سے طیارے کے ایک مسافر نے بات کرتے ہوئے کہا ہے کہ طیارے میں ایک مسافر کی طبیعت خراب ہوگئی جس پر قریبی سیٹ پر بیٹھے دوسرے مسافر نے اس کی مدد کرنے کی کوشش کی تاہم اس دوران اس کی پی آئی اے کے عملے کے ایک رکن سے تلخ کلامی ہوگئی جس پر بات زیادہ بڑھ گئی جس پر اس مسافر نے طیش میں آکر دھمکی دی تھی مگر اس نے جہاز کو بم سے اڑانے کی قطعاً کوئی دھمکی نہیں دی۔پی آئی اے انتظامیہ کے مطابق طیارے میں عملے کے 11 ارکان سمیت 308 مسافر سوار ہیں جو حفاظت سے ہیں۔